माई-सुमिरन

हे माई !
हम त तोहार करीं वंदना ॥
हम मुरख नाहि हमरे गियनवां,
येही लिए तोहरा क धरीं धियनवां।

कछु अइसन कयि दा माई-

करीं हम रचना॥
हे माई ! हम त तोहार ............. ।

ना एको फूल ना आखर बाती,
कछु कहि पाई ना बेधैले छाती।
हमरा के दे दा माई-
ज्ञान भरी रसना॥
हे माई ! हम त तोहार .............. ।

बड़ नीक लागे तोहरी हंस क सवरिया,
बीनवा से झरेले रस-फुलझरिया।
इहे रूप धयि के-
उतरिजा मोरे अंगना॥
हे माई ! हम त तोहार............... ।

ज्ञान-विज्ञान क तूं एक सगरवा,
एक बूंद खातिर ह्करे हियरवा।
हे माई ! अउर कछु-
मोरी गरजि ना।।
हे माई ! हम त तोहार............... ।

हम हईं माटी क एगो पुतलवा,
मनई बना दा एका देके परसदवा।
एहै आस लेके-
करीं तोहार अर्चना॥
हे माई ! हम त तोहार................ ।