बवूराये हो...

देखि के अकसवा मा उमड़ल बदरिया,
बवूराये हो चित मोरा सवरिया।।
     झूला झूलत सुधि तोहरी आवे,
     तोहरे सिवा मोहे कछु नहि भावे।
     चिहुँक उठे जियरा जब चमके बिजुरिया-
     बवूराये हो....
नहीं कोई चिट्ठी ना कोई सनेसवा,
भूलि गयो प्यारे तू जाई के बिदेसवा।
हुकि उठे सुनि-सुनि के रेल कै बंसुरिया-
बवूराये हो....
   नदी -पेड़-पर्वत पे छायी जवानी,
  हरी-भरी धरती कै अनुपम कहानी।
  उमड़े जियरवा लखि नदी कै लहरिया-
  बवूराये हो....
वन-उपवन में पंछी कै कलरव,
नर्तन मयूरा कै कुसुमित पल्लव।
लगै नीक नाही बड़ सुन्दर फुलवरिया-
बवूराये हो....
  बरखा त हवै सब ऋतुवन कै रानी,
रिम-झिम फुहारन कै अदभुत रवानी।
झुलसे बदनवा जब बरसै बदरिया-
  बवूराये हो....
बिरहा अगन कै लौ नहि दिखती,
चारो पहर पर रहती सुलगती।
समुझै जलन बस पगली बावरिया-
बवूराये हो चित मोरा सावरिया।।